विराटनगर / सोमबार बिहान ६ बजेको थियो । विराटनगर बसपार्कमा एक महिला छटपटाइरहेकी थिइन् । प्रसव पीडाले छटपटाइरहेकी उनी थिइन् सुनसरीको इटहरी उपमहानगरपालिका–७ गैसारकी ३५ वर्षीय सालु सरदार । उनी गर्भवती थिइन् । बच्चा जन्मिएका बेला आवश्यक पर्ने कपडा किन्न भारतको जोगवनी बजार जाने क्रममा विराटनगर बसपार्क आइपुगेपछि उनलाई प्रसव पीडाले च्यापेको हो । त्यही क्रममा उनले छोरा जन्माइन् । महिलाले खाली भूइँमै शिशु जन्माएको कुरा सुनेपछि स्थानीय बासिन्दा भेला जम्मा हुन थाले । केहीले तन्ना दिएर सहयोग गरे । केहीले चाउचाउको रस बनाएर खुवाए ।

सालुलाई नवजात शिशुसहित विराटनगर–११ जनपथकी सन्तोषी श्रेष्ठले प्रहरीसँग समन्वय गर्दै आफ्नो बा १६ च ३६७९ नम्बरको कारमा राखेर बिहान ६ बजे उद्धार गर्दै उपचारका लागि कोसी अस्पताल पु¥याइन् । प्रसव पीडाले छटपटाइरहेकी महिला सडकमै सुत्केरी भएपछि उद्धार गरेर अस्पताल पु¥याइएको श्रेष्ठको भनाइ छ ।

सडकमै बच्चा जन्माएकी सालु सलबार बायाँ ।

सडकमै बच्चा जन्माउने सालुका पहिलो सन्तान १२ वर्षका छोरा छन् । दुई महिना अघि श्रीमान ४० वर्षीय राजकुमारको अचानक मृत्यु भएपछि घरमा छोरा र गर्भवती अवस्थाकी उनी मात्रै थिए । पारिवारिक आर्थिक अवस्था एकदमनै कमजोर रहेको र श्रीमानको पनि मृत्यु भएपछि थप समस्यामा परेको सालुले बताइन् । उनले गर्भवती भएपछि अहिलेसम्म चेकजाँचका लागि कुनै पनि अस्पताल र स्वास्थ्य संस्था नगएको बताइन् । मोरङ प्रहरी प्रमुख एसपी विश्व अधिकारीले खुला ठाउँमा महिला सुत्केरी भएको सूचना प्राप्त भएपछि स्थानीयसँग समन्वय गर्दै सुत्केरी अवस्थाकी महिला र नवजात शिशुलाई उद्धारमा प्रहरीले पनि सहयोग गरेको बताए ।

अस्पतालका सूचना अधिकारी विष्णुबहादुर बुढाथोकीले सुत्केरी आमा र नवजात शिशु दुवैको स्वास्थ्य अवस्था सामान्य रहेको बताए । उपचारमा संलग्न चिकित्सकलाई उद्रित गर्दै उहाँले शिशुको तौल २ दशमलव ७ किलोग्राम रहेको जानकारी दिए । बुढाथोकीले सामान्य तरिकाले बच्चा जन्मिएको भए पनि २४ घण्टासम्म चिकित्सककै निगरानी आमा र बच्चालाई राखिने बताए । उनले अझै पनि धेरै जसो महिलामा गर्भवती भएका बेला नियमित स्वास्थ्य परीक्षणका लागि अस्पताल जानु पर्छ र स्वास्थ्य संस्थामै बच्चा जन्माउनु पर्छ भन्ने ज्ञानको भने अभाव रहेको बताए ।

(Visited 12 times, 1 visits today)

Leave a comment

Your email address will not be published. Required fields are marked *